SERMON EPISTEL/PARTANGIANGAN,2 TESALONIKA 3: 1 – 12

 

SERMON EPISTEL/PARTANGIANGAN

MINGGU KANTATE, 3 MEI 2026

“MARENDE DO AU TU JAHOWA”

2 TESALONIKA 3: 1 – 12

 

I.   Patujolo

Raja Kassandros do manggoari kota Thormai gabe “Tessalonik” na gabe  ibukota  Makedonia  songon  goar  ni  tungganeboruna Thessalonike di taon 315 SM. Ditaon 50-51dibongoti jala dipajongjong Apostel Paulus huria di Tessalonik. Tolu minggu Apostel Paulus di Tessalonik alai mangiburu (late) ma roha ni halak Jahudi   tu   si   Paulus,   dipaksa   ma   ibana   ingkon   manadinghon Tessalonik gabe laho tu Berea (Ul. Ap.17:1-9; 1 Tes.1:9). Alai dung sahat nasida tu Athena, disuru ma si Timoteus manopot Huria Tesalonika na imbaru tubu i, jala di Korintus ma si Paulus paimahon si Timoteus (1 Tes.3: 1 -6). Dung mulak si Timoteus sian Tesalonika tu Korintus manopot si Paulus, diboan ma angka barita na nidapotna, laos ido na mangonjar roha ni Aposte Paulus laho manongos surat tu huria   Tesalonika.   Mamodai   huria   i   asa   marsihohot   di   poda haporseaon naung sahat tu nasida. Adong do tolu (3) bagian isi ni surat 2 Tessalonik on, ima: 1. Pamujina di haporseaon  ni  huria Tessalonik.  2.  Haroro  ni  Kritus dohot patujolona. 3. Angka sipaingot asa unang manadinghon ruhut na denggan.

II. Hatoranga Ni Turpuk 

Ringkot situtu do tangiang di roha ni apostel Paulus ido umbahen na sai gomos dipodai huria i asa marsitutu martangiang huhut mangula (ora  et  labora).  Dipangido  ibana  do  asa  tongtong  ditangianghon ulaon panghobasionna ala dirajumi ndang tarpatupasa marbarita nauli molo sian gogona sandiri. Ndang na malobi hu pangidoan i. Marhite tangiang napinangido na i boi marlojong Barita Nauli na binaritahonna i dipartingkianna na satongkin songon namasa ditongatonga ni huria Tessalonik. Tung mansai doras do harararat ni

Barita  Nauli  diangka  namanjanghonsa  songon  na  tarsarurat  di Psalmen 147:15: “Ibana manongos bagabagana tu tano on, mansai doras marlojong hatana i”. Dipartudoshon do doras ni parlojong ni Barita Nauli i songon sahalak parsiadu. Dihirim roha ni Apostel Paulus do marhite tangiang ni huria i asa malua  angka  parbarita  na  uli  sian  halak  na  jengkel   jala  na jahat. Halak na jengkel jala na jahat ima halak parpoda haliluon, na so mangulahon lomo ni roha ni Debata, na so manghalomohon Barita na Uli dohot na pasiaksiak angka naporsea di Tuhan Jesus. Ndang dipangido ibana asa di agohon angka Halak na jengkel jala na jahat i, alai dipangido asa dipalua do. Ido nang na gabe ujian ni haporseaon na ingkon adopan ni halak namanjalo Barita Nauli jala holan dibagasan tangiang do boi taradopan nasida saluhutna i. Songon i do naung diadopi si Jason sahalak ruas ni Tessalonik (Ulaon Ap. 17) nadipasiaksiak  ninorhon  ni  namanjanghon  parbarita  na  uli,  alai diapoi Apostel Paulus do raha nasida paboa na haposan do Tuhan i napatoguhon jala namangaramoti angka naporseai maralohon angka na jahat. Marhite haporseaon dipangaramotion ni Tuhan i do boi nasida tenang dan aman ditongatonga ni angka parjahat. Ndang tarrampas ni manang ise haporseaon nasida di Tuhan i.

Pos do roha ni Apostel Paulus dibagasan Tuhan i na tongtong nasida mangulahon angka poda nasintong na sian Hata ni Debata. Ndada sian gogo ni hadirion nasida laho mangulahon i, alai Hata ni Debata i do na mangula namangalehon gogo naimbaru di nasida. Naeng ma nian dirajumi nasida paboa Hata ni Debata na gabe Barita na uli songon tanda ni holongni roha ni Debata, asa marhite i lam tangkas panandaon nasida di habengeton ni Jesus. Nang pe mangadopi sitaonon nasida ala ni haporseaon na togu, naeng ma patuduhonon nasida holong ni Debata jala dibagasan habengeton ni roha songon Jesus ro di ujungna.

Boi dohononta turpuk on songon pandangan etis ni apostel Paulus taringot tu ulaon namarhadomuan tu haporseaon. Bulusma mula ulaon. Dipaandar do taringot tu habuluson mula-ulaon dohot tu na

manghangoluhon na ni omo. Di ngolu hakristenon taantusi do pasupasu do na mula ulaon. Molo tapamanat pandohan on mansai ampit do tu poda ni Raja Salomo na manosohon asa marsiajar tu porhis (Poda 6:6-11). Dipatudos Apostel Paulus do angka na so mula ulaon jala na manjama na so siulaon songon angka na so maradat (Ind: orang yang tidak tertib hidupnya). Ndang apala dipatangkas rumang ni pangalaho marhite pandohan na manjama na so siulaon, alai sosososo asa manghangoluhon na niomo. Angka na so mula ulaon dohot na manjama na sosiulaon martudutudu tu sikap na spekulatif jala na so taratur. Dohononta ma ra i dipangalaho saonari isara ni pangotootoion/penipuan, panangkoon, juji, korupsi. Ndang adong ketenangan ni halak na losok na so ra mula ulaon, jala godang do angka akibat na tubu siala halosohon, isara ni sahit ni pingkiran, pagalehon tondi jala manegai pardagingon. Sabalikna, marhite ulaon, kesempatan na arga doi dilehon Debata tu jolma asa boi marhobas di Tuhan i dohot manghobasi donganna jolma.   jadi ndang holan sisi ekonomis manang psikologis jumpang uli di angka na mula ulaon. Dipatuduhon Apostel Paulus do dirina nagabe tiruan di namangula ulaon asa unang sorat manang gabe boban di huria i. Ndada holan dihata be manosoi halak asa mula ulaon. Ingkon gabe tiruan ma di parange dohot angka ulaon na denggan.

III. Hahonaan Ni Turpuk

a. Di keadaan na gok sitaonon dohot ketidakadilan, ndang muruk Apostel Paulus tu Debata manang marungutungut. Gariada, martangiang do ibana, dipangasahon do gogo ni Debata di sude situasi.  Laos  i do nang dipanosoionna tu huria Tessalonik asa girgir nasida martangiang tarlumobi manangianghon angka parbarita na uli nang angka naung naporsea di Barita na uli i. Torop do Halak na jengkel jala najahat na mamangke kemajuan ni tekhnologi nuaeng laho manegai haporseaon nang na manusai angka naporsea i. Tangiangta tu Debata, ndada holan napaubahon namasa alai rumang ni haporseaonta dohot panandaonta na umbalga do Debata sian sude parungkilon na taadopi. Unang mansadi hamu martangiang (1 Tes 5:17).

 b. Godang do na mangarajumi jala mangantusi na mula ulaon i holan hinaringkot dingolu pardagingon sambing. Alai mangihuthon Martin Luther dohot Johannes Calvin, na mandok na so holan haporluon di ngolu pardagingon sambing na mula ulaon, alai panjouon ni Debata do i tu jolma. Ala ni i gabe dalan patuduhon pangoloion dohot haunduhon ni jolma do molo olo jala ringgas ibana mula ulaon. Dimulana i, dung madabu jolma na parjolo i tu dosa, uhum ni Debata do na mula ulaon (1 Musa 3:17-19). Alai dung mate Kristus Jesus ndang lohot be uhum i tu jolma (Rom

5:18) gariada tahe malua ma sian uhum. Nang joujou na mula ulaon pe gabe pasupasu do di angka siihuthon Kristus. I do umbahen  na disosohon  Paulus  asa ganup  na porsea naeng ma padot jala ringgas mulaulaon. Nuaeng on tung mansai maol do di na deba dapotan ulaon. Ia adong na dapotan, dirajumi doi silehonlehon ni Debata. Sabalikna molo so dapot, dirajumi do i parungkilon bolon di ngoluna. Alai anggo apala na nidokna asa mula ulaon ndada holan asa gabe parkarejo dikantor manang di pabrik. Ndada holan asa gabe siallang gaji lapatanna. Dilului ma karejona, diula ma siulaon na patut na so maralo tu lomo ni roha ni Debata na mamboan hita nang angka donganta tu hadengganon ni ngolu nang parsaoran pe. Na mula ulaon i ma na mangalului pandaraman ni ngoluna, bohal ni ngoluna dohot na ringkot di ibana. Asa dapotan ngolu dohot haringgason na mangula ulaon do na niigilna.

c. Goar ni minggu ima Kantate: Endehon hamu ma di Jahowa ende na imbaru. Haporseaon ndada holan marhite hata alai diendehon do i marhite pambahenan. Martangiang ido na gabe hosa ditingki marende di Jahowa jala mula ulaon ido na gabe melodi ni ende i. Di  minggu  Kantate  on,  paingothon  hita  paboa  sude  gulmit  ni ngolu, ditingki martangiang nang ditingki mangula pe ido ende ta diadopan  ni  Debata.  Naeng  ma  adong  keseimbangan (harmonisasi) antara namartangiang dohot mangula asa uli endeta diadopan ni Debata. Amen.

 

 

 

 

 

 

 

 

Berbagi :